Alla Itolae Nusa 8

Alla Eri nete loko Nu kai pusue binatana rebe pialaelu more kai rebe pialaule, rebe usakesa kaini me kapale. Alla Iono balate ehbue kena nusare, eti kwele eono kena eseru.

Iksobi pusue kwelea ului meru kai Iksobi lanite papela otoi, hoko ulane lea,

kai kwele seru rame. Hoko petua utune esa lesi butu limare lia, kwele seru lau pene.

Eleki kena tanggale butu esa lesini itu, bulane itu, Nu eni kapale soraele kena ulate Ararate.

Kwele seru rame hoko kena bulane butu esa, tanggale esare selu ulataru menai peneka.

Eleki petua butu ata suike lia, Nu ibaeke kapale mere esi jendela sae,

eleki itie manu olakwe inai sae. Manue mere eribu lori lopai eti kwele nseki.

Eleki itie manu abune inai sae leke irekwa be kwele seru bei nusare pene pibe mosa.

Po manu abune mere esupu otoi kena esabuke mo le kwelere ere lolo nusare sa, hoko eleu suike loko Nu me kapale. Nu ibatake baleije eleki esabuke balaije eleki ikusuele.

Eleki Nu inamake petua itu suike, pine itie manu abune mere suike leneka.

Eleki kena kmaure manue mere eleu loko Nu, kai iselu yo ekeri ai saitune loini matane kena esi biruije. Bei mere hoko Nu irekwa be kwele seru bei nusare peneka.

Eleki inamake petua itu leneka, pine itie manu abune mere suike, po manue mere eleu suike lokoi moneka.

Eleki kena Nu eni musuna utune ne lesini esa, kena tanggale esa bulane esa, kwele nseki tapa bei nusare peneka. Eleki Nu ibaeke kapale esi maka obire leke ilimese keholi, hoko hkutukeni le iselu nusare nseki menai peneka.

Kena tanggale butu lua lesini itu, bulane lua, nusare nseki laleke peneka.

Eleki Alla Ibeteke loko Nu be,

“Ale kai amu bina kai amu anaru kai esi binaru, imi siri bei kapale mere.

Asirie kai manua, binatana maketa rebe elake tone leke ulei boka kena pusue nusa.”

Eleki Nu kai eni bina, eni nanaru kai esi binaru esi siri bei kapale mere.

Pusue manua kai binatana rebe me tapele usiri bei kapale mere totoini lulu esi ooainu.

Eleki Nu iono otoi kena pala tanei rebe riluke ete TUHANE. Eleki irana papelake manue kai binatana maketaru rebe riluke ete TUHANE yele inai esesa, eleki ipalalu ete TUHANE kena otoi mere.

Kena TUHANE Iata binatanaru esi boini ntelete mere, Ibeteke me laleIje be, “Au atia nusare suike bei tamata eni nsalale moneka, masike au rekwa be tamatare bei tone eti ielare laleije tiae. Kai Au atia suike taneia rebe esi nasite saka Au onoe meije moneka.

Kena nusare ere me sare, tale kena atnane kai tale kena supu hasile, tale musute kai ndirine, lea kai ulane me, kpita kai kpetu seli lomai rame.”